Vlotte rebbel

Veur Aond stelt een lèven zonder voetbal helemaole niks veur. Toen de corona uutbrak en ’t d’r nao uutzag dat hee an huus gebunden zol raken hef hee laoten zien dat hee in hoge maote zelfredzaam is. Via ’t Meneertien van de Krante raken hee thuus bie de media.

Kreeg ’t veur mekare van ’t persagentschap umme de rust- en endstanden en de gèle en rooie kaarten deur te geven en zo ok in coronatied bie de voetbal an te kunnen schuven. Hee jaag stad en land of en elkene in de stadions kent um.

Kottens namp hee op de snelweg een verkeerde ofslag, drééjen umme en een old Daffien zetten um klem. Daor stappen twee dienders uut waorvan d’r ene al gelieke een buukien teveurschien halen. Of hee niet wis da-j op de snelweg zo mar niet achteruut kunt riejen. Aond is niet allenig met hamer en spiekers een hendige knooiert. Hee is ok slim in ’t bedenken van smoezen.

Of hee de Daf niet had zien enkomen? ,,Ja, wel zekers. Mar daor maken ik mien niet druk umme. Daor riejt allenig olde vrouwluu in. Ie verwach toch niet dat daor twee smerissen mee op pad gaot?” De dienders keken mekare an, scheuten in de lach en kwamen haoste niet meer bie. Met een ,,Maak ie mar da-j weg komp” kon hee de rit nao ’t stadion vervolgen.

Veurege wèke, op weg nao PEC tegen Heerenveen bellen Gaitjan um op. Of hee woensdaggenaovend thuus was. Wiezer eworden zetten hee de auto an de kante en gaf toen pas antwoord, Mar dat zat um niet glad. Dit keer een echte plietsieauto die op um of kwam. Of hee niet wis da-j niet zo mar an de kante van een snelweg kunt staon. ,,Ja, mar ik heb mien netties ehollen an’t verbod umme niet in de auto gesprekken te voeren. Ik bin op weg nao ’t Abe Lenstra stadion. Heb niet veule tied meer.”

Hee vertellen de plietsie dat hee heel ’t land ofreis en avanovend zien favoriete club an ’t waark wol zin veur de krante. Ene van de dienders metene d’r aopver heer: en welke club is dat dan wel?” Aond vulen an dat hee hier een kans had. Mar tsjonge, d’r veur uutkomen dat hee meer met Zwolle op had zol um in dit geval met PEC besmeuren. Hee was al in Friesland en deurumme zei hee op een toon die gien twiefel liet: Heerenveen vanzelf!

De agent keek op zien klökkien, borg zien buukien op en zei: maak mar da-j weg komp, anders mis ie ;’t begin nog. Ik laote ’t bie een gèle kaarte. En weer is de baord an een prente ontsnap. Laot noe PEC ok nog winnen. Zien weekend kon niet neer kapot.

Groetenisse van Gait.