Heggescheer

Ik vule mien naodat ik in de stoel van de haorsniejer heb ezèten een pond lichter. Merie had mien al een keer of wat onder de neuze edsruk dat ik mien schamen mos dat ik met ‘t geld van de kapper in de zak liepe. Ik heb eur vrindelijk verzöch um de klachten deur te geven an Rutte in Den Haag.

Ie heb d’r een hele bonke in Nederland die ’t niet zo nauw nemp met hoe ze d’r van baoven bie loop, mar daor heur ik niet bie zak oe vertellen. ’t Is mien ok een gedoe met dat lange haor. De combinatie van mondkappen, ooriezers, brille en lank haor vrug umme problemen. A-j die kappe in de gauwigheid op wilt doen dan vlug oe de brille de ene kante uut en de ooriezrs  de andere kante. Nuump ’t veur mien part verkapte ellende in driekwartsmaot.

Ik wil Rutte wel vraogen of hee as ’t weer een keer zo vere is een seintien wil geven zodat ik nog gauw effies onder ’t scheermes kan stappen. Begin veurege wèke was mien ’t haor zo lange dat ik eers mar effies heb informeerd of de coiffeur ok een heggeschere in bezit had . Mar dat vun heen niet neudig. Toen ik van de stoel of stappen leek ’t wel of ze Sneeuwwitje onder handen hadden eneumen.

Temee krie-j schaopen scheren nieje stijl met manskeerls die op de rugge lik in plaatse van de schaopen. Merie meent dat wie te maken heb met een kammenet van haren en snaren. Niet nao de kapper en niet samen muziek maken. Mar goed, de tondeuze is weer in warking. Wat de kunst betref blif d’r niks meer an de striekstok hangen . D’r loop al luu rond die mu van muziek of wilt halen. 

Umme nog effies op de kapper terugge te komen. ’t Was stoel in en stoel uut, ze stunnen in de rieje. Gien tied veur een praotien. Meestieds haal ik daor de leste niejtjes vot, mar dat zat d’r dit keer niet in. En eerlijk is eerlijk: ok de koning stun met lank haor op ’t bordes dus die had ok gien veurkennis. Hoe dan ok: ze hoef as ’t umme corona giet de kapper d’r niet met de haor bie te sleppen. Die heb ‘d r genog van dat Den  Haag ze tegen ‘t haor instrik.. 

Gien haor op de kop die ze nog een keer met scheer en zepe allenig laot. Merie zeg dat ik met dat alles gien haor bèter bin. Mar ja, ofgeven op ’t kammenet is ok gien optie. Dat zit in disse slimme tied ok met de hande in ’t haor. In elk geval hoef ik d’r gien gries haor meer van te kriegen. 

En noe kap ik d’r mee.

Ontvank de groetenisse van Gait.