Raodselachtig

Aont is met een groot raodsel ’t nieje jaor in egaon. Een dag veurdat tweeduzendtweeëntwintig zich melden waren ze allemaole vot: zien duven of doeven, al nao da-j gewend bint umme duiven te duiden. He hef d’r nog al wat in de hof: dikke twintig die bie um an kwammen vliegen of die hee gewond of versufd van de straote op hef eraap.

Want Aont is de grootste dierenliefhebber van ’t westelijke halfrond en das een gloepens ende. Luu die diers kwaod doet, ze màttelt, of niet genog voer geef, die komp de man met de baord tegen. Die geet veur niks en niemand an de kante zoas de luu weet die kippen op ’t voetbalveld gooit. Dan speult hee veur scheidsrechter en grip ze in de kladden.

Vol ongeleuf keek hee s mââns nao zien lege hokken. Of buurman Henk ok een vos had ezien. Nee, allenig een slimme vos Aont, hef hee ezegd, en daorveur hoef ie mar in de spiegel te kieken. ’t Zat ‘m niet lakker. Hee vulen zich sloerig in de rakket of a-j n’t zo wilt zien poesterig in de pokkel. Wat in vrede was d’r an de hand.

Niejjaorsdag nog niks ezien. Daor zat hee met zien nieje zak voer.Tegen de aovend, hee kon ’t niet geleuven, alle twintig weer terug. “Ie gaot zelf niet op vakantie, mar daor denk oew duven anders aover”, maken Henk nog een grappien. Vanzelf aoverheersen bie de baord blieschap aover de terugkeer van zien maoten.

Hee bleef zitten met prakkezoasies aover ’t veurval. Verbeelden hee ’t zich of keek um ene van de beeste wat schuuns an met een ondeugend köppien. Dat was zien iongste anwinst: uut Nimwègen. Zol hee de anstichter wèèn? An zien nieje vrinden hebben willen laoten zien waor ’t volk lup met de Vierdaagse? Een duuf kan niet praoten en de Vierdaagse is al twee jaor van de bene.

Ja, wach is effies. He had zich op de bewuste dag wel verslaopn en ’t voer veule later nao ’t lege hok toe ebrach. Niej voer ok nog is een keer. Aont blif d’r mee zitten en is met een onopelös raodsel 2022 in estap. Hee hef ik weet niet hoeveule doevenmelkers an escheuten mar die kunt ‘m ok niet uut de droom helpen. Ene duve vot, dat is niet ampat, mar ’t hele spul, dat hef gien mense mee emaak.

Veiligheidshalve is hee mar weer op ’t olde vertrouwde voer aover estap. Misschiens een protestactie van de gevleugelde vrienden. Wie ’t weet mag ’t zeggen. Henk denk dat Aont las hef van opvliegers, mar dat liek mien stark.

Luu, ik wens ule allemaole een gezond jaoren haope daww de corona de baas kunt worden.

Groetenisse van Gait.