Balle

24 mei 2026 om 10:55

Gert Toorn, ie weten wel van de kapper maak knapper, is bezunder sportstief. Hee bepaolt bie WHC zo’n bettien welke speulders pas bie de Wezepers of misschiens mut ik in dit geval zeggen: wie d’r geknip veur bint. 

Gert is niet eenkennig as ’t umme de voetbalsport geet. Hee kon zelf aorig tegen een ballegien trampen, mar met zien bestuurskwaliteiten is hee toch een heel stuk vädder ekomen. Bie SEH en noe dan bie WHC. Hee hef d’r volgens een hele hoop volk een goeje kiek op en weet waor de schere d’r in mut.

Toorn hef niks op met gedoe en dat bliek ok uut zien steun an verenigings. A-j noe denk dat hee zich lut leiden deur sentimenten dan hei-j ’t toch mooi bie ’t verkeerde ende.

Kottens schunk hee de wedstriedballe an OWIOS in Oldebroek. Niet helemaole toevallig want die mossen tegen SEH en daor hef hee heel wat stappen staon.

Kwaodsprèkers ze-k dat ’t een balle was die veural de kool van OWIOS uut rollen, mar dat is egees niet waor. Dewiel dat hee in Wezep ’t klassebehold van WHC vieren met een kolt pilsien was ’t toch wel zo dat de Heerdenaren OWIOS een poot dwars zetten.

'T is de vraoge of die late kool van de Heerdenaren wel met zien balle töt stand kwam. Ze rapen bie toeren een anderen op. Hee, hef d’r wel ’t neudige van mutten heuren, luu die d’r ballegien aover op gooien. Ie heb noe ene keer luu die d’r een bonke van of weet en luu die d’r gien bal van snap.

As ’t op de voetbal an kump is Gert Toorn uut Wezep d’r geknip veur

Nee, Gert is d’r ene van ‘t soort dat mekare ’t liefste de balle toespeult. Hee weet ok wel dat wie kaats de bal mut verwachten. Mar kaatsen, dat hef d’r gien bal mee van doen.  As OWIOS nao de Pinkster met de hande in ’t haor zit dan weet ze in ieder geval dat d’r ene in Wezep is die ’t wel weer in ‘t fatsoen kan kriegen.
Misschien scheert de club nog via de naocompetitie de tweede klasse binnen. Mar wie weet heb ze wel alsnog de pette tegen de zolder an egooid bie Columbia in Apeldoorne. As veurspeller bin ik gien knip veur de neuze weerd a-j Merie meug geleuven. Ze zeg 't mien veus te vake, ze-k mar permanent! En op die maniere kom ik weer bie Gert terechte.