Onvat

24 april 2026 om 11:06

Ik wete niet of ’t joe ok op is evallen, mar de leste tied kump ’t steeds vaker veur dat mansluu met een dikke vrachwagen de straoten blokkeert. Somtieds laot ze ’t verkeer van beije kanten een stief kwetier blauwbekken veurdat ze weer optrek.

Mu-j goed luustern, ze mut in ’t drukke verkeer ’t spul kwiet. Daor wil gien kwaod woord aover ezeg hebben. Mar ’t geet umme de sjaffeurs die niks met beveurraoding heb van doen, mar uut pesterigheid de dikke bak midden op de weg zet zodat ik d’r met mien karregien al niet meer langs kan komen. Zelfs met de fietse was ’t ondoenlijk.

Gister was ’t helemaole van de zotte. Twee grote keerls stunnen te lachen op een kruuspunt waor de luu die vaste zaten rood anliepen. 

Merie en ik mossen nao een begrafenis. Ze proberen dat an de sjaffeur uut te leggen, mar die maken ’t onbenullige gebaor met de middelvinger en zei: “Truus, gaot mar nao’t fenuus” en ging deur met niks doen. Hee mos iets ofgeven, mar dee-j d’r een eeuwigheid aover umme pakkettien in de klavieren te nemen. 

 ‘t Worden helemaoe van de gekke toen de onverlaat anstalten maken umme tussen de wielen van die bak te gaon staon wateren. Met de ene vrieje hand zwaaien hee ok nog is demonstratief nao de luu die ‘m wel vernielen konnen. De hulpe kwam van baoven. In dit geval van de man waor dat pakkie veur bestemp was. Die argeren zich d’r ok an en niet zon klein bettien. Hee leggen de vinger op de mond, gaf Merie die helemaole aoverstuur raken, een teken umme effies of te wachten, rollen een slange uut en drééjen de krane lös. ’t Ieskolde water raken de wateraar midscheeps. D’r kwam meer op ‘m dan dat d’r bie ‘m uut kwam kan ik joe verzekeren. Hee wis niet hoe gauw hee ’t spul weer nao binnen mos hengelen onder ‘t hoongelach van zien publiek.

De onvat kreeg van baoven te heuren dat ’t bie ’t lös drééjen van de krane een klein stukkien mis was egaon. Net zo as bie zien kunde in ’t parkeren.

Ons niet laoten bestrullen deur eensjaffeur die ’t hele kruuspunt blokkeren

Nee, wach effies, dit is d'r niet ene van 't ras dat met de hoge brandstofprieze mut sabbelen umme rond te komen. Daor heb ik bes mee te doen. Mar wie heb ons op de Renderklippen deur de kwaodwilligen niet laoten bestrullen. Hol 't in de rie met mekare. GAIT.