Klerazie

16 april 2026 om 13:13

Ik wet niet hoe ’t bie joe in zien wark geet, mar bie mien op de Renderklippen ku-j de klokke d’r op gelieke zetten. Zo gauw as de eerste veurjaorszunne deur brik dan mut ik mien waren. Dan verandert Merie in een warvelwind en zet ’t hele huus op de kop.

Aoverleg? Ho mar. Zo lange as ze zich buten mien kantoortien ophölt is d’r niet zoveule an de hand. Een alderkeizers gepoets en gedoe, alles mut van de mure, ’t olde spul vot en de middenstand op ’t darp hef d’r een goeien an.

Mar ie begriep ’t wel: op een gegeven monument wördt de deure van ’t kantoortien lös esmeten, ik krege met de duum een gebaar van vot wèzen en de eenvrouws opruumploeg schut in de vuufde versnelling.

Ik bin mar effies nao de hof uut eweken, want daor grip ’t onkruud umme zich hen en daor word ik dagelijks deur de vrouwe an herinnerd.

Dezelfde duum gaf mien an dat ik weer in mien optrekkien terug kon keren. ’t Was tegen de tied dat ik mien biedrage naor NEOmedia deur mosse zenden en daor wol ik dus mee gangs.

Mar de schrik was groot toen ik mien stukkien niet meer op ’t bureau zag liggen. ’t Hef d’r effies veur ehollen, mar uuteindelijk gaf Merie toe dat ze ’t olde papier in de askiste had esmeten. Ik nemme an dat joe weten dat ik daor de container meer bedoele.

Merie geet as een warvelwind deur t huus en ok mien kantoortien mut dr an geleuven

En met dat ik nao buten kieke kump de vuulniswagen d’r an umme ’t pampier op te halen. Ik as een haze nao buten, viel nog zowat aover de klompen en op kousevoeten nao de vuulniskeerls die net de grieper d’r in wollen zetten. Ik graaien en vun al gauw mien epistel.

Die mansluu kregen d’r niet genog van met eur gelach. Die menen dat ik as sôeze niet meer wis waor ik mien spullen liete.

Mar ik mut Merie toch een vere in ’t achterwark stèken, want bie ’t  binnen halen lag d’r pampiertien in ’t gruun op de container met de complimenten van de ophaaldienst dat de inhold van de bak sporen met de veurwaarden van plastic, drankpakken en blik. Ja, ze kiek vanzelf niet nao mien schriefsels.

Mar op 't darp zag ik een hele bulte bakken met een rood pampiertien en dat wil zeggen: d'r zit van alles in wat d'r niet inheurt..... Groetenisse GAIT.