Spiekers

19 februari 2026 om 12:45

Hoe of ie ’t ok wendt of keert: ’t geet altied weer umme de spiekers. Ie könt nog zukke mooie ideejen hebben; wanneer d’r gien geld veur is dan ku-j ’t schudden.“Holt mien d’r aover op”, zeg Merie, mar wat die allemaole in huus wil vertimmeren is met ’t salaris van de hele buurte niet te betalen. 

Wat dat an geet hef de aoverheid ’t een stuk makkelijker. Die stelt iets vaste en wie betaalt ’t met zien allen zonder dat 't evraog wordt. 

En de ondernemers gaot in ene vaart mee. Alles wordt duurder en as ik mien vrouwe zo heure lup ’t met de bosschappen de spuigaten uut.

En as iets niet duurder wordt dan doet ze wat minder in een zakkien of flesse.

Noe laezen ik in disse krante dat de politiek Den Haag nog een bettien wil helpen. Ze bint gangs umme aoveral in ’t darp flitspaolen te zetten en die verstop ze dan zo da-j niet meer weet waor a-j ‘t zuken mut. Ie loop zogezegd ’t risico da-j aoveral veur paol kunt kommen te staon. 

De wensenlieste van Merie is met de hele buurte niet te betalen

Noe ku-j d’r nog bettien raekening mee hollen umdat ze die flitsapperaten een waeke of wat op dezelfde plekke laot staon. 

Mar ’t verhaal hef twee kanten. D’r wordt in sommige wieken in Nunspeet, Elburg en Oldebroek zo alderkeizers hard ereejen dat oe de gedienen in de veurkamer begint te wapperen. Dat ’t daorbie veus te vake mis geet steet umme in de beeldspraak te blieven as een paol baoven water. 

Ik bin d’r niej nao of ze ’t veurbeeld van Ermelo gaot volgen. Naodat ik heb verneumen wilt ze d’r daor ok al gauw weer van of. Ze gungen d’r van uut dat de boetes in de kas van de gemeente zollen kommen, mar  dat heb ze glad verkeerd. De spiekers gaot allemaole nao Jetten en co in Den Haag. Een niej kammenet kos een paar griepstuvers mu-j mar denken. Veurdat ze op de stoepe bie de koning konnen staon is d’r ene vrouwe al weer nao huus estuurd. Die had ’t rapport van de slimste deerne uut de klasse in estuurd en daor heb ze deurhen ekeken. 

Wie hobbelt al een aorig ende op de verkiezings an. Dat wordt een veul grotere potloodaffaire mu-j mar denken. Tja, ie heb mensen en potloden en in dit geval geet dat gelieke op. GAIT