Kater

A-j noe meent dat diers kats gien benul heb dan mu-j mar is bie Freek uut Oldebroek de neus um de deure stèken. Die kan ’t oe haorfien uutleggen. Hee is een alderkeizerse dierenliefhebber, dat veurop gesteld. Gien wonder dat bie um hond en kat goed met mekare op kunt schieten. Ze deelt bie vlagen ’t voer.

Wat hee oe zal vertellen hef met Bram de kater te maken. Die geet zien eigen gang, hef zien kàttenluuk, weet dat e zich niet druk hoef te maken umme zien nattien en dreugien. Dat is Freek as gien ander toevertrouwt. Gien wonder dat ’t beessien dagelijks nao um toe kump umme met köppies zien dankbaarheid töt uutdrukking te brengen. Ene keer in ’t jaor mut hee met Bram nao de dierenarts veur ze-k mar een APK-beurte. Een prikkien hier en een spuite daor.

Veurege wèke was ’t weer zo vere. De ofspraak stun umme negen uur, net as in ’t veurege jaor. In de mâântied , as Freek en de vrouwe de stoete nao binnen heb ewâârk, kump Bram nao ze toe en sprink op schoot. Dat is nooit anders en daor ku-j de klokke geliek op zetten. Freek aaien um aover de kop en zei : straks effies nao ome dokter jonge en dan ku-j d’r weer mooi een jaor tegen. Bram keek um an, lanceren zichzelf as een raket en gunk d’r vandeur. Freek en de vrouwe heb ezöch töt ze d’r zo ongeveer bie neer vielen, mar zonder risseltaot.

Hee hef van armoee de dierenarts of mutten bellen. Pas tegen de middag kwam de katte weer op huus an. Keek nao zien baassien en gaf peuties. Freek hef een nieje ofspraak amaak en d’r niet meer aover epraot waor as Bram bie was. Komp um niet an met dat diers gien gevuul heb. Die heb zelfs in de smiezen wat d’r een jaor later geet gebeuren.

Zien zwaoger Henk mut d’r bie schuddekoppen van ‘t lachen. As die met Tarzan an de beurte is sprink de hond al uut de auto veurdat hee de kans krig umme de deure dichte te doen en vlug bie de dokter nao binnen. Zol ’t dan toch bie een hond anders liggen as bie een katte? Nou nee, dat mu-j toch anders zien. Disse diere arts hef een assistente die gek is van herders . En Tarzan beheurt töt dat ras. ’t Deerntien stop ze vol met brokken. Dan wordt hondstrouw al umsgeliek praktijk.

Inmiddels hef Bram ok zien beurte ehad. Freek liet veur 2022 eren andere daotum vaste leggen. Want ’t liek d’r op dat Bram veur APK zien eigen verklaoring hef bedach: Algemene Pesterieje Katers. Freek is d’r niej nao hoe ’t volgend jaor oflup. Of Bram dan weer a’s ’t zo vere is de kat uut de boom kik.

Met Bouffon, onze Franse bul, gien ellende. Die weet van de katte gien kwaod.

Groetenisse van Gait.