<p>Gait van de Renderklippen</p>

Gait van de Renderklippen

(Foto: )

Christan is prèkeberend

  Column

Eerlijk duurt ietsies langer. 

’t Is nog mar zon keerltien. Ik heb ’t aover Christan, een ventien van een jaor of vieve, in de Ramabuurte. Hee praot honderduut tegen iederene die bie zien va Gert de botten Lieke löt leggen. As de buurvrouw met de hond deur ’t zandpad lup is hee niet meer te hollen. Gif te kennen dat hee op de voetbal zit en op ’t zwemmen. Bie de één wel veule lopen en bie de ander vinnig kold. Met de antekening dat hee’t toch nao zien zin hef. De hond mut wel van ’t gresveld van pa blieven want ie weet mar nooit wat hee daor van plan is.

Veurege wèke zag de buurvrouw ‘m vremde meratten maken met zien fietsien. Hee gooien ’t pleeriezer, zo nuump de Twenten een vervoetrmiddel wat bie de Pruus Fahrad is edoop, an de grond. Christan ging an ’t wrieven aover de auto van zien va. De buurvrouw vreug ‘m of hee de auto op wol poetsen. “Ik ga met de handen over de krassen”, zei ’t mannegien. “Bi-j tegen de autro ereeien?”, wol ze weten .“Nee”, zetten ’t keerltien grote ogen op. “Niet ik maar de fiets.”
“Dat moet je dan maar gauw tegen papa vertellen”, gaf zee ‘m mee. Hee vlaog aoverende en zei:”Nee, dat doe ik pas na ’t eten.”

En hee hef woord ehollen. Nao ’t èten is een rekbaar begrip. ’t Hef d’r drie dagen veur ehollen. ’t Lag ‘m denk ik zwaor op de mage. Christan zag zien va met ’t zweit op ’t veurheuf doende umme een lekke band luch te geven. Hoe va toch zo dom kan wèèn umme die band te hetter en te fletter te riejen.
Hee zag zien kans schoon.
‘Pap, dan moet ik ook wat vertellen. Ik ben tegen de auto geknapt’

En zo kon Gert nao dat hee de klus met de band had eklaord met ’t lak an de gang. Um in de beeldspraak te blieven: hee had d’r gien lak an dat Chritan zien versie van eerlijk duurt ’t langst had opevoerd. Christan was d’r inde tussentied al aover hen dat de fiets zich zeer had edaon.
Hee fiets noe met een baoge umme de auto hen, zich bewust dat hee de stuurmanskunst nog niet helemaole meester is.
Met veule trots hef hee de buurvrouw al een keer of wat laoten zien hoe de robotmachine met ’t gres in de hof korte metten maak. “Dat doet hij helemaal uit zichzelf”, vertellen e heel enthousiast. Gister stun ’t ding stil. Gert kreeg ‘m niet meer an de praot. Is d’r een steugien mee an ’t heisteren ewes. D’r was gien bewèging meer in te kriegen.
Toen kwam Gert zien vrouwe d’r op of. “Christan wil je wat vertellen.” Net op ’t moment dat zien va ’t apperaat uut mekare halen en d’r iets wits in zag stèken. Hee vertellen datte wolweten of die robot ok een poetslappe an stukken kon kriegen.
Hee proaten d’r bie de buurvrouwe aover hen. ‘t Water was toch wel warmer bie de zwemclub. En dat was zien maniere umme nattigheid te vulen. De kleine prèkeberend hef mien huukien disse wèke ered.

Groetenisse van GAIT

Meer berichten

Het lokale nieuws in uw mailbox ontvangen?

Aanmelden