Foto:

Column: Gien meneuvels op de latten

Gait van de Renderklippen

Aover de grens gaon is in disse tied dubbelt onwies. Met dat Corona virus mut wie heel veurzichtig wèèn. ’t Is al muuilijk genog umme ’t hier in ons eigen kikkerlantien te ontlopen. Dus mu-joezelf aover de grens niet nog ’s een keer extra in de problemen laoten brengen. Wat ’t leste an geet leek Gaitman in de gevaorenzone te raken. Ik had mien deur Annegien aover de streep laoten halen . Ze had as opschötteling hele verhalen van mien eheurd aover mien prestaties op de lange latten. Dat mos ik dan mar is bewiezen. Mar bie mien is ’t meer een geval van an de latten. Merie stik anders in mekare. ’t Vogelnessien op de gymnastiek was eur grootste kunsien: wieter veur de res is dat niet uut ekomen. Annegien hef mienan de kop zitten zeuren umme ’t een dag of wat te proberen in Oostenriek. Vlak aover de grens va, niet zon ende ,as of dat wat uut maak veur de olde botten. Merie mut zich d’r zo neudig ok nog tegenan bemuuien. ,,Ie meug wel iets veur die deerne aover hebben”, en zo wieter. ’t Speulen allemaole veur de Corona-tied, dat zul ie wel begriepen.

Bie Corona mut van ’t kammenet ’t olde eers op

’t Leek mien wies umme toch veuraf an de conditie te schaven in de sportschoele. Och mensen, veurdat ik daor de trappe of was naor de martelkelder hing mien de tonge al op ’t dàdde knoopsgat. Mar nao een dag of wat ging ’t al een stuk vlotter. Ik raken an de praot met de opperflopper van de sportschoele en vertellen ‘m wat ik van plan was.
"Dan heb ik een toestel staon wat geknip is in oe situatie. Daormee doe-j de skibeweging: van links naor rechts en van achter naor veurten.” Met behulp van de stange veur mien buuk bleef ik in evenwicht en schaof ik van de ene naor de andere kante. De opperflopper zag ’t an en schuddekoppen. "Dat hef zo gien zin mannegien. Op de piste ku-j oe toch ok niet vaste hollen? Lös met de hande!” Ik liete mien niet kennen. Och lieve mensen. Ik was nog gien twee tel lös van de stange of kalebateren van ’t dink of en niet zo zunig ok. Op de rugge, met pienscheuten deur ’t hele lief. Ze heb mien met drie man weer in de bene mutten helpen. ’t Zweit brak mien uut. Dat worden strompelen op de Renderklippen. De plannegies veur Oostenriek waren op slag van de bane. ’t Dikste deel van de rugge blauwer as de Donau en stief as een staldrempel.
Veur Annegien is ’t ok op niks uut elopen, want tegen die tied stak de Corona de kop op. Noe ik daor aover naodenke: is ’t verstandig van ’t kammenet umme daor zoveule behei van te maken? Mekaar gien hand meer geven is töt daor an toe. Wäärken met de ellebaogen bint eie al gewend toch? Mar praoten aover de lèèftiedsgrens veur wel of niet behandelen geet mien te varre.
Knelis, mien buur, lot de verjaorsdag schieten. "Ik worde temee tachtig en dat meug ze in Den Haag niet weten, want dan kom ik op de lieste van mensen die d’r niet meer toe doet. Onder ’t motto: olde knappers eerst.” Daor stèèk ik zelfs de vlagge van Henk Kemps niet veur uut. Luu, veurzichtig an is mien handreiking. Holt de klongels d’r onder, groetenisse van GAIT.

Meer berichten

Het lokale nieuws in uw mailbox ontvangen?

Aanmelden