Foto:

Column Gait: Mooiste spul blif in de kaste

Alles is in ’t lèven an verandering onderhèvig. Denk an hoe wie d’r vandage de dag bie loop. Nog niet allemaole met gaten in de bokse, daor ziet de olderen onder ons gien gat in, mar ’t was Claus al die de traditie van de strik hef deur eknip. Kotte tied later bleven de stropdassen aoveral warkeloos in de kaste hangen. Bie rouw en trouw komp ze in de spiekerbroek anzetten. ’t Is gien gezichte ze-k de senioren onder ons. Gebrek an respek meent anderen. Ik zitte d’r een bettien tussen in. Die knellende stroppe hoef veur mien ok niet meer. Kreeg ie d’r iets meer vet op de botten bie en was ’t een geklongel van hier töt gunder umme ’t leste kneupien dichte te kriegen. En dan ok nog de stropdas d’r onder langs. Ie begunnen ’s mâârns vrog al nao aosem te happen en tegen de middag liep ie blauw an. Een hele bonke manskeels heb d’r een onmundige veurraod van.

Mar een broek die al versleten is as e uut de winkel kump, daor zie-j Gaitman niet in lopen. Dat heurt bie wat mien moe mee rangschikken onder fatsoen hollen.Mar ’t is niet allemaole vot, wat de tradities an geet. Nemp noe de gewoonte van onze vrouwluu umme ’t beste goed op een planke achterin de klerenkaste te laoten liggen veur de speciale momenten. En wat bint dat dan wel? ‘k Zol ze niet graag de kos geven die dat goeje grie pas an krieg as ze d’r zelf al geen weet meer van heb. Pas a-j uut de tied bint. Een vorm van misplaatste zunigheid, want ze-k noe zelf: ie wilt d’r toch ok nog een bettien van genieten?Merie heurt bie de hors categorie, bie de slimsten za-k mar zeggen. Ik krege van Annegien een alderkeizers mooi spothemp uut Italië. Ene umme u tegen te zeggen. Zo fleurig en kleurig dat ’t met gien penne is te beschrieven. Ik hadde gien kans umme mien d’r mee te tooien. ’t Ging op de achterste stapel. Dat zat mien al een steugien dwars. En bie al dat gisten raken de kurk van de flesse. Ik pakken de gelègenheid an umme de traditie de nek te brèken.Merie had met Mina de buurvrouwe of epraot veur een concertien in Nimwègen – Mina had ebof met twee kaarties veur disse Koningsdag - en Gait had ’t riek allene. Ik had ’t hemp nog mar net met de klavieren aover de nekke of Annegien kwamp eur va opzuken. “Man man, dat steet oe geweldig. Ie liek wel twintig jaor jonger”. Ik gruuien een pond in een tel. Ze hef mien ’t Italiaanse geval netties glad estreken. Ik was ’t Meneertien! Annegien had behalve de Franse bulldog Bouffon ok nog wat lakkers mee ebrach en dat mos al gauw in de sloeke. IJs met een flinke laoge sukela. En toen worden ’t bewaorheid da-j nooit twee dinge tegelieke mutten doen. Ik weze Annegien op’t kleurenpalet dat zich bie mien op de borstkaste ontvouwen met de ijsco in de hande. En dat gunk hastik fout. D’r kwamen op ’t Italiaanse aoverhemp nog wat kleuren bie. Och lieve mensen. Mien dochter hef ‘m ee eneumen en ewassen. ’t Lig noe weer stief achterin de kaste. Ik bin bange dat ’t d’r pas weer uut kump as Gait uut de tied is.

Groetenisse van de Renderklippen GAIT

Meer berichten

Het lokale nieuws in uw mailbox ontvangen?

Aanmelden