Afbeelding

Gait van de Renderklippen: Lèverworst

Overig

‘t Meneertien van de Krante kump bie ons ‘t hofpad op huppelen. Hee lach van oor töt oor. Dat vrug um een verklaoring. Die gif ‘t mannegien mar al te graag. Hee is nao eigen zegge nal een kilo of vuve kwiet deur zich wat meer in bewèging te zetten. Noe is dat ok weer niet zon grote opgave, want hee beheurt töt wa-j ‘t stilstaonde ras zollen kunnen numen. Noe ok weer niet zo slim dat ‘t bie een polsbeweging blif, mar zien Knuffeltien mut ‘m nogal is anmanen um uut de luie stoel te komen. Sinds dat ze ‘m in decoronatied een keer of wat de krante onder de neuze hef ehollen, met warvende tekst van Olga Commandeur en anderen veur dagelijks een blukkien umme, maak hee stappen. En niet zo zunig ok. ‘Soepel in de botten Gait en zwierig in ‘t heuf”, mos ik van um anheuren. Dat eerste kon ik begriepen, mar dat leste vreug umme een uutleg. Die gaf hee mar wat graag. “,t Is mien opevallen dat veule meer luu in bewèging komp. Zelfs Willem van Diene zag ik schufelen. Diekump al jaoren niet vàdder as de straole pruumtrabak die hee uutspiejt. En wat mie nok opvalt is dat d’r een hele smak volk met de hond op pad geet. ”En toen kwam ‘t op de zwierigheid. “Ik stao d’r verbaas van dat de diers van hàdder töt anterriër allemaole mien kante uut komp lopen. De meesten sprink tegen mien op. Ik hebben ooit een hond ehad, zoas bie joe met Bouffon, de Franse bulldog, en toch komp ze naomien toe. De diers heb kenneklijk deur dat ik goed in mien vel zitte, dat ik fit bin. Daor holt die honde van. Ze ruuk al van ofstand dat ze met iemand van ’t niejs te doen heb. Wie hef ’t dan nog aover stomme honde? ”Merie kwamp binnen met de koffie en heuren ’t an. “Dan zu-j noe ok wel wat vaker bosschappen doen veur oe Knuffeltien?” Dat met een schuun oge in mien richting. Die balle koppen ’t Meneertien d’r niet in. Zoiets vuult mansluu onder mekare an. Daor is goen aoverleg veur neudig. ’t Gunk al gauw aover alles wat duurder was eworden. Zelfs bie de kapper. Daor geet oe ’thaor van aoverende staon. Nao ’t tweede köppien maken ’t Meneertien zich op veur de terugtocht. Hee zoch in de zakken nao de sleutels en zei “Verhip, ik hebbe dit helemaole niet of egeven.”En uut de linker broekzak kwam een bes ende lèverworst te veurschien. Ik hakken d’r metene op in. “Niejsgierige honde? Of ie worst lus. Van lèverworst töt Hansworst.” En wegwas ’t Meneertien. Merie en ik heb nog tien minuten elachen töt daww d’r kramp van in de kaken kregen. Doet veurzichtig an, holt de kop koel met die hitte.

Groetenisse van GAIT

advertentie
advertentie
Afbeelding
Leuke verhalen na schrijfworkshop Tineke Honingh 17 aug, 15:45
Afbeelding
Vizier op ’t Harde en Hulshorst: competitie met inspirerende tegenstanders 17 aug, 15:03
Afbeelding
Gait van de Renderklippen: Rebels 15 aug, 11:07
Afbeelding
Brandweer houdt water op voorraad wegens groot risico natuurbrand 15 aug, 11:05
Afbeelding
Opgelet, zakkenrollers: bendes maken de regio onveilig 15 aug, 09:42
Afbeelding
Brommers kiek’n in Elburg voor het goede doel, daar maak je je agenda voor vrij 14 aug, 10:34
Afbeelding
Classic demo in ’t Harde: snikheet maar zó cool! 14 aug, 09:41